مشهد الراب العربي من أقوى المشاهد الموسيقية في المنطقة، مش بس في الإنتاج الموسيقي ولكن كمان في الإنتاج البصري و2018 شهدت إنتاج قوي جداً وكثيف على المستوى العربي وقدرنا نطلع أفضل 10 فيديوهات راب عربي.

ومن هنا تقدر تشوف قائمة ٢٠١٩ لأفضل 50 تراك راب في الوطن العربي


تراب بلدي - عصام

فيديو تراب بلدي للرابر عصام من المغرب وللمخرج المغربي الصدّيق أصلي. نجاح الفيديو في فكرة اللعب على النوستالجيا المغربية واستخدام عناصر زي "الموطوبيكان" أو الدراجة النارية اللي لسه بتستخدم في المغرب في المناطق الشعبية، منها حي "درب سلطان". كمان نجح عصام في إبراز عنصر اللبس زي "الترينج سوت" اللي تميزت بيه بداية التسعينات.

بشكل عام قدر "عصام" يبعد عن أي شئ يدي انطباع إن في تأثر بالتراب الأمريكي وأوضح إن التراك ده تراب مغربي خالي من "الأمركة".


عظمة - ابيوسف

فيديو للرابر أبيوسف ومن إنتاجه الموسيقي. الفيديو من إنتاج ستوديو "كوكاينا". "عظمة" فيديو غامض، غريب ومربك جداً. قدر فريق عمل ستوديو "كوكاينا" كريم شريف ومحمود عطا الله وبلال رباح، إنهم يخلقوا حالة من الفزع المرئي، بمعنى إن لو كان "أبيوسف" بيغني ميتال كان هيكون فيديو مخيف عشان الألوان والإضاءة البرتقاني اللي في الخلفية والشخصيات الكارتونية المربكة اللي في الخلفية دي كلها بتكون صورة مرعبة، مع التركيز على وش "أبيوسف" في بعض اللقطات.


إجرمن عنهن - مسّلم هديب

فيديو "إجرمن عنهن" للرابر الأردني مسّلم هديب، بالاشتراك مع رابرز تانيين هما "كريست الزغبي" و"الوسام". الإنتاج الموسيقي للموزع "الأركديوسر". الفيديو متصور في روسيا والأردن. الفيديو من ألبوم "بعد الاحتلال". قام مسّلم هديب بالإنتاج والإخراج. في حاجات في الفيديو لفتت الانتباه زي حالة الرقص اللي بتمثل الوطن العربي والزي اللي لبسه الراقص اللي هو عبارة عن كيس قمامة ولما تسمع الألبوم، وخصوصاً الأغاني اللي فيها عينات صوتية من يونس شلبي في مسرحية "مدرسة المشاغبين"، وتربطها بظهور "مسلم" في الفيديو وهو لابس تيشيرت عليه صورة يونس شلبي، تعرف مدى تأثره بيه وازاي هو بيعكس التأثر ده بصرياً وصوتياً


ماتربينا - رابرز تونس

تجمع 13 رابر تونسي هما "Sanfara ، Si lemhaf ، Nader Gh ، Sniper Mc ، Arslén ، Weld El 15 ، Akaross "TooNes  ، Amriano ، Larab ، Gati ، Cha9Cha9 ، Blvck في فيديو "ماتربينا" من إنتاج CazZa Production وكان الإنتاج الموسيقي ل LWilliamsBeats ويعتبر "ماتربينا" آخر أعمال الرابر التونسي Samara اللي اتحجز في شهر "سبتمبر" اللي فات و بعدها انطلق شعار "فري سمارا" من جمهوره، غياب "كلاي بي بي جي"  في الفيديو استفز مشاعر الجمهور المتضامن مع الرابر. التراك معبر جداً عن المشكلة التي تسببت في القبض على سمارا وعن معاناة الحياة في تونس ومقارنتها بمصر والهجرة غير الشرعية وغيرها من أوضاع حياتية الشباب بيرفضها.

36 ترييكا - شوكا

فيديو "36ترييكا" لفريق شوكا من المغرب، والإنتاج الموسيقي للموزع "نو رولز" والفيديو من إنتاج "نانو برودكشن" وإخراج رضا أبكار. في كمية مؤثرات بصرية من صُنع "رضا"، هي دي اللي ميزت الفيديو عن باقي الفيديوهات في المشهد المغربي، خصوصاً إن الفيديو نزل في أول سنة 2018، يعني كان افتتاح قوي.

صبيرا - نسيو

فيديو "صبيرا" للرابر المغربي "نسيو" من ألبومه الجديد "أفون جوت". الفيديو عبارة عن رسومات غير متحركة رسمها الفنان ريبيل سبيرت وأخرجها هاريت زياد. الفيديو فريد من نوعه على عكس الاتجاه السائد في الراب العربي، ونادر جداً لما نتفرج على فيديو مزيكا بالرسوم أو جرافيك على عكس المعتاد، طبعاً فكرة الرسم بتسهل تنفيذ الأفكار عشان الموضوع بيكون فيه حرية أكتر من ناحية التكاليف مثلاً.

هات - الراس

فيديو "هات" هو أول فيديو كليب رسمي للرابر اللبناني "الراس"، اللي نزله في أول شهر مايو، من إنتاج وإخراج يحيى مراد. الفيديو فكرني بفيلم "ثرثرة فوق النيل"، نفس الفكرة إن الناس في غيبوبة رغم الأحداث اللي حواليهم.

عطه قاز - فلب و ليل إيزي

فيديو "عطه قاز" للرابرز "فلب" و "ليل إيزي" من المشهد الخليجي اللي بيضم البحرين والكويت والسعودية وقطر والإمارات. الفيديو من إخراج المخرج المعروف "رائد المريش" وإنتاج Outlaw Productions. المشهد الخليجي معروف بقوة الإنتاج المرئي


جوست فيس - 777 موب

فيديو "جوت فيس" هو أول فيديو لفريق "777 موب" بزعامة الموزع "777 نرد" من المغرب واللي كمان هو المنتج الموسيقي للأغنية. الفيديو من إخراج هشام صبري. الفيديو بسيط، مميز جداً بحركة الكاميرا اللي بعدته عن الملل و في نفس الوقت بعيد عن الإفراط في الحركة. التلوين والإضاءة والمؤثرات البصرية مع المزيكا و أداء الرابرز، قدروا يخلقوا فيديو يختموا بيه 2018 صح.

كود - تندرس

فيديو "كود" من الرابر المغربية "تندرس" من المدرسة القديمة في المشهد المغربي، والإنتاج الموسيقي ليها هي برضه. الفيديو من إخراج AZZA LAKRATI. مشهد الراب العربي هو مشهد صعب تلاقي فيه رابرز بنات كتير والأصعب إنك تلاقي فيديوهات ليهم عشان مافيش رابرز بنات كتير ولا في إنتاج كتير، بس الوضع مختلف شوية في المغرب العربي عن باقي الدول العربية، ضيف على الكلام ده إن مش هينفع نعمل قائمة أفضل فيديوهات راب من غير بنت رابر، و كمان قوة الفيديو تعادل باقي القائمة.