مافيش شك إن 2018 هى أقوى سنة لصناعة فيديوهات الراب في مصر، بقى في مرحلة جديدة هي ظهور كيانات تنتج الفيديوهات من أول التمويل لحد الإخراج والمونتاج وكل اللي بيحتاجه الفيديو عشان يطلع للناس في شكله النهائي. اختيار الفيديو مش متوقف على أداء الرابر بس، لكن متوقف على العناصر اللي كونت الصورة اللي أنت شايفها قدامك، زي التلوين وحركات الكاميرا والإخراج والفكرة وكل عنصر من عناصر بناء الفيديو كليب. القائمة بالترتيب طبعاً.


فيديو ساليني

فيديو ساليني للرابر ويجز والإنتاج الموسيقي للموزع دي جي توتي. الفيديو من إنتاج شركة "الدُب البارد" ومن إخراج باسم فوكس.

تكوين الصورة من بنت بترقص لظهور ويجز في أعلى المبنى وخلفية البحر وراه، لحد مشهد الشارع السريع، مناسب للتكوين الصوتي للموسيقى ولأداء "ويجز" والأغنية كلها ماشية برتم معين.

فيديو دوس بنزين

فيديو دوس بنزين للرابر أصيل وتوزيع موسيقي للموزع 27Corazones ومن إخراج خالد إبراهيم. الفيديو من إنتاج شركة our broadcast واللي يميز الفيديو ده فكرة التكرارية بدون ملل وإن كل مرة في تفاصيل زيادة رغم إن المشهد مكرر وكل ده بيحصل مع لقطات سريعة تتخلل المشهد، عشان تضيف عناصر جديدة عليه، ضيف على الكلام ده فكرة التلقائية في أداء العيال اللي بتجري، بمعنى إن مافيش تمثيل.

فيديو 365

فيديو 365 للرابرز مروان موسى ودوشة، الإنتاج الموسيقي للموزع مروان موسى، فيديو من إخراج رائد المريش، واحد من أحسن الناس اللي بتقدر تعمل فيديوهات راب واسمه مسمع جداً في مشهد الراب السعودي والمصري. الفيديو له لون داكن مميز وده لون فيديوهات "رائد" مميز بيها جداً. فكرة استخدام الكرفان بليل مع التلوين الداكن للفيديو واستخدام الإضاءة بشكل غير مبالغ فيه، عمل قوة جمالية للصورة اللي بيكونها رائد المريش.

فيديو كربون

فيديو للرابر E Evil وإنتاج موسيقي للموزع راكان والفيديو من إنتاج "الجانج" وإخراج منير مظهر. الفيديو له طابع مميز جدا في مشهد الراب المصري وهو اختيار مكان تصوير بعيد عن زحمة المدينة. المؤثرات البصرية استخدامها كان مناسب لمكان التصوير، بس أكتر حاجة مميزة في الفيديو هو الجو الصحراوي غير المستهلك في صناعة الفيديوهات في مشهد الراب المصري.


فيديو عزرائيل

فيديو للرابر أبيوسف وإنتاج موسيقي أبيوسف برضه وإخراج وائل علاء وإنتاج شركة GoodPeople. النظرية بتقول إن صناعة فيديو كليب ناجح هي معادلة صعبة مش هتكمل، إلا لو العنصرين (سمعي وبصري) كاملين، والعنصر السمعي لازم يكون متوفر من أول الإنتاج الموسيقي لحد قوة الرابر نفسه وكلماته وأدائه، والعنصر البصري هو قدرة المخرج ومؤلف الفكرة إنه يخرّج الأغنية من حلتها (السمعية) لحلتها الجديدة (البصرية) ومطلوب منه يعمل حاجة جديدة تجذب العين وتحير المخ وتبهر العقل، زي ما المخرج وائل علاء قدر يعمل في أغنية أبيوسف "عزرائيل" وبكده تكون المعادلة تحققت.

Abyusif - Azrael عزرائيل from WAEL ALAA on Vimeo.

فيديو كيكي

فيديو للرابر مروان موسى ومن إنتاجه الموسيقي، الفيديو كليب من إخراج مروان موسى وتصوير أبيوسف ويو جي. الفيديو فيه استخدام كثيف للمؤثرات البصرية اللي متناسبة جدًا في الإيقاع مع مفاتيح البيانو، ده كان وارد جدًا إنه يحصل عشان المونتاج والموسيقى عملها نفس الشخص، مروان موسى.

فيديو قوانص

فيديو للرابر يو جي وإنتاج موسيقي هو برضه، فيديو من إخراج خالد إبراهيم ومن إنتاج شركة our broadcast.

الفيديو وألوانه وطريقة حركة الكاميرا فكروني بالفيديوهات الأولد سكول بتاعت إن الرابر يفضل في نص الشاشة مع تغيير الخلفية باستمرار. أداء" يو جي" المميز في الفيديو وستايله، جزء مهم في صناعة الفيديو.

فيديو تفاح

فيديو للرابر يوسف الجوكر والإنتاج الموسيقي للموزع nayz وإخراج عبدالرحمن أشرف. الفيديو ألوانه ثابتة ومناسبة جدا لأماكن التصوير وموود الأغنية، بمعنى إن مشهد البحر والشكل الداكن ليوسف الجوكر واللون الأسمنتى للمكان، ده لوحده كافي إنه يحط المشاهد في موود معين مسيطر عليه على طول الفيديو، حالة ثابتة بس من غير ملل.

فيديو فلكلور

فيديو للرابر مروان بابلو والإنتاج الموسيقي مروان بابلو برضه، من إخراج سبيكو والفيديو إنتاج شركة الدُب البارد.

ناس كتير كانت منتظرة لحظة إن مروان بابلو ينزل فيديو، واللي كان محل اهتمامي لما عرفت إن "بابلو" بيصور فيديو؛ يا ترى إيه شكل الفيديو ده وهيطلع مروان عامل ازاي؟ فاجئني المخرج سبيكو ومجموعة الدُب البارد بإنهم عرفوا يرسموا شخصية "بابلو" بشكل بسيط، بمعنى إنهم قدروا يعكسوا شخصيته الموسيقية بشكل واضح من غير ما يكون في زخرفة أو زحمة في الفيديو.

فيديو عظمة

فيديو للرابر أبيوسف ومن إنتاجه الموسيقي، الفيديو من إنتاج ستوديو كوكاينا. "عظمة" فيديو غامض غريب ومربك جداً، قدر فريق عمل ستوديو كوكاينا "كريم شريف ومحمود عطا الله وبلال رباح" إنهم يخلقوا حالة من الفزع المرئي، بمعنى إن لو كان أبيوسف بيغني ميتال كان هيكون فيديو مخيف بسبب الألوان والإضاءة البرتقاني والشخصيات الكارتونية المربكة اللي في الخلفية.